Koktebel Jazz Party халкъара фестивали даа зияде колемли ве рагъбетли олаята, деп, Русие Федерациясынынъ медениет назири Владимир Мединский Коктебельде пресс-конференцияда бильдирди.
«Фестивальге энди 10 йылдан зияде. Бу тек Къырымда дегиль де, джаз алеминде пек эмиетли тедбир, онынъ ичюн биз бир тюрлю сиясий денъишмелерге бакъмадан, фестиваль девам эткенине, бундан да зияде, даа колемлидже, рагъбетлидже олаяткъанына пек къуванамыз», — деп, къайд этти назир. О фестиваль туристлерни де джельп эткенининъ муимлигини айрыджа къайд этти.
Владимир Мединский сонъки бир къач ай девамында Медениет йылы черчивесинде Къырымда пек чокъ чешит медений тедбирлер кечирильгенини айтып кечти. «Ярын, мисаль ичюн, Акъярда арбий-тарихий фестиваль ачыладжакъ. Анда да чешит мемлекетлерден бир къач бинъ мусафир, тарих, медениет авескярлары», — деди о. Бундан гъайры Къырымда Москва циркининъ ве Росгосциркнинъ гастроллери кете, буюк театро гастроль программасы такъдим этильди, музей сергилери тешкиль олунды. «Шимди Къырымда откерилеяткъан эписи тедбирлерни айтып кечмек ичюн сёз биле етишмез», — Медениет назирлигининъ башы бу фикирни къошты.