— Сиз музыка иле огърашманъыз ичюн не ильхам берди?
— Догърусыны айтсам, бильмейим. Даа бала олгъанымда мен къолума не расткельсе, эр шейге урып бакъмагъа тырыша эдим: мисаль ичюн, къашыкълар ве сенеклер алып, орталыкътаки эр шейге урып бакъа эдим. Ве бу ал мен биринджи бала давул тертибатымы эльде этмегенимдже девам этти. Ондан сонъ даа бир дане, ондан буюкчеси олды, сонъра исе манъа акъикъий сойыны багъшыш эттилер.
Сен кичкене олгъанынъда бу эписи эркелик. Сен огърашсанъ да олур, огърашмасанъ да. Амма мен буюген сонъ, музыкагъа терендже далдым — оркестрлерде, такъымларда чалып бакътым, мен анъладым ки, давул чалмакъ — бу не къадар аджайип. Мен озь дерслериме пек джиддий янашып башладым. Сонъ-сонъуна мен атта бу себептен мектепни ташладым. Бираз кечче исе мен консерваториягъа кирдим
— Не ичюн сиз дигер услюплернинъ чокълугъы олгъанына бакъмадан, айны джазны сайладынъыз? Жанрны денъиштирмеге ич бир вакъыт истемединъизми?
— Мен бираз яш олгъанымда, рок иджра эте эдим. Брайан Адамс услюбине ошагъан бир шей. Лякин мектепте мен ойле инсанларны раст кетирдим ки, олар мени фанк иле таныш эттилер, фанктан кечип мен джазгъа кельдим. О заман мен анъладым: джаз тили о къадар озгюн ки, о эр бир жанр музыкасыны иджра эткенде керек ола билир. О эм техниканы, эм музыкаль тефеккюрни о къадар инкишаф эттире ки, оны бир шей иле денъиштирмек къыйындыр. Керчек, мен ич бир вакъыт айны джаз давулджысы олмагъа истемей эдим, амма озь чалувымда тамам джаз тилини къулланмагъа истей эдим.
Жанр денъиштирюв акъкъында… Мен арада-сырада чешит жанрларда чалмагъа меджбурым. Меселя, кеченлерде бир ирланд пабында чалдым, анда программа эсасен каверлерден тешкиль олунгъан эди ве бу меракълы эди. Лякин мен анълайым ки, пек чокъ вакъыт мен айны джаз ве фанк чалам, ве буны токътатмагъа истемейим. Чюнки бу меним аятым. Мен Джамал иле бир такъымда иджра этем, о манъа дерс бере эди. Буны мен насыл этип ташлайым?
— Джаз Америкада пейда олды ве бутюн дюньгъа джайралды, бир ерде гузельдже ерлешти, башкъа ерде исе беттер. Фелеменкте бу ёнелиш иле вазиет насыл?
— Фелеменкте джазнынъ озь тарихы бар. Мында пек гузель чалгъыджылар чокъ. Америкалылар мында чалмагъа кельгенде, бутюн такъымлары иле кельмек ичюн оларнынъ парасы етишмей эди, онынъ ичюн оларнен ерли чалгъыджылар я да Алманиядан чалгъыджылар иджра эте эдилер.
Джаз шимди де мында баягъы популярдыр, амма эгер сен энъ гузеллер бешлигине кирмесенъ я да оларнен чалмасанъ, сен онынъле пара къазанып оламазсынъ. Мен эвельден айткъаным киби инсанлар джазны севелер, амма о мында пек чокъ. Мен атта ондан безильди дер эдим. Мисаль ичюн, Алманиягъа чалмагъа барсанъ, сени пек сыджакъ къаршылайлар. Koktebel Jazz Party фестивалинде де тамам бойле эди. Фелеменкте асыл да ойле дегиль, мен атта джаз мында шимди инкишаф эте деп оламайым. Шахсен мен о кечмишнинъ бир еринде токътап къалгъан киби ис этем. Тек бир къач чалгъыджы оны инкишаф эттирмеге, янъы бир шейлерни уйдурып чыкъармагъа тырышалар, бу арада исе чокълукъ бибопта токъталып къалды, джазнынъ маиети исе — даимий инкишафта.
— Koktebel Jazz Party фестивали Фелеменкте беллими?
— Догърусыны айтсам, пек белли дегиль. Мен достларыма бойле фестивальге кетем дегенде, олар эписи: «Къайда» деп, сорай эдилер. Мен Къырымгъа кетеджем дегенде, олар эписи къоркъа эдилер. Чюнки сонъки девирде биз бу улькедеки вазиет акъта пек яхшы хаберлер алмай эдик. Онынъ ичюн Koktebel Jazz Party акъкъында малюмат оларгъа барып етмесе керек. Фестиваль акъта тек интернеттен бильмек мумкюн эди, къалгъан КХВ бизде онъа къол тутмай эдилер. Мен бу фестиваль акъкъында — чалгъыджыларнынъ теркиби не къадар аджайип олгъаны акъта, аля дереджеде тешкиль олунгъаны акъта икяе эткенде исе — сиз оларнынъ чырайларыны корьген олсанъыз. Эр кес айретте къалды.