Къырымда энъ эсас музыкаль вакъианынъ, Koktebel Jazz Party халкъара джаз фестивалине кутьлевий малюмат васталары ичюн аккредитация башланды. Артистик къасабасы джаз йылдызларыны ве джаз музыкасыны севгенлерни августнынъ 20-22 куньлери къабул этеджек.
Аккредитациядан кечмек истегини koktebel-jazz.ru фестивалининъ сайтында бильдирмек мумкюн. Аккредитация фестивальни айдынлатмагъа, матбуат-меркезде булунмагъа, концертлер девамында матбуат-тедбирлерни ве партерни зиярет этмеге, эм де фестиваль кечирильген эписи куньлери Акъмесджит – Коктебель – Акъмесджит маршруты боюнджа трансфер иле къулланмагъа акъ бере.
Koktebel Jazz Party фестивали иштиракчилерининъ ве онынъ сейирджилерининъ хавфсызлыгъы темин этильмеси ичюн, тешкилий комитет Роспотребнадзор идаресининъ коронавирус боюнджа талапларына дикъкъат айыраджакъ. Иштиракчилерге, мусафирлерге ве сейирджилерге фестиваль мейданларыны зиярет этмек ичюн талаплар джедвели онынъ сайтында нешир этильди.
Июнь айында Koktebel Jazz Party фестивалине билетлер сатылып башланды. Билетлерни Concert.ru сайтында, эм де фестиваль куньлери онынъ мейданларындаки кассаларда сатын алмакъ мумкюн. Кириш билетлернинъ фияты — 500 рубле, партерге билетлернинъ фияты — 1500 рубле.
Эвеллери Koktebel Jazz Party-2021 тешкилий комитети онныъ биринджи иштиракчилерини илян этти. Koktebel Jazz Party-2021 фестивалининъ Русиели иштиракчилери арасында «Уральский диксиленд» адлы постсовет девиринде энъ эски аньаневий джаз ансамбллеринден бири, Яков Окуннинъ йылдызлы интернациональ ансамбли, джаз пианоджылары Даниил Крамер ве Валерий Гороховский илян этильди. Фестивальнинъ программасында Георгий Гараняннынъ биг-бэнди (Краснодар), Русиели чалгъыджы ве бестекяр Сергей Головня ве онынъ Electro Machine, ве «Голос. 2 мевсим» адлы шоусынынъ иштиракчиси Ольга Синяева ве онынъ лейхасы AllSeeBand киби меракълы болюклерден ибарет.
Коктебельде джазнынъ 19-джы мевсиминде четэль иджраджылар да иштирак этеджек. Адетиндже, оларнынъ адларыны ачылув куню, августнынъ 20-де такъдим этеджеклер. Koktebel Jazz Party-2021 фестивалининъ толу программасы иле онынъ сайтында ачылувгъа якъын таныш олмакъ мумкюн.
«Koktebel Jazz Party» фестивали - COVID-19-дан бош территория. Агъыр эпидемиологик вазиет себебинден фестивальге етип кельмек шартлары денъише биле. Бу аллар регионда эпидемиологик вазиетке ве Роспотребнадзор идаресининъ тевсиелерине коре денъиштириле биле.
Шимдики вакъыт фестивальнинъ иштиракчилерине, мусафирлерине ве сейирджилерине учь весикъадан энъ аздан бирини такъдим этмек керек.
- Менфий ПЦР-тест, о, 2021 сене августнынъ 18-ден сонъ япылмалы
- COVID-19 S-акъына антителалар олмасы акъта весикъа, о, 2021 сене майыснынъ 25-ден сонъ япылмалы
- COVID-19-дан ашылама сертификаты
Коктебельде джаз фестивали 2003 сене Коктебель джазынынъ темель къоювджысы — журналист Дмитрий Киселёвнинъ шахсий тешеббюси оларакъ пейда олды. Кичик Къырым кою дюньяджа белли джаз тедбирлери джедвелине кирген фестивальге ад берди. Йылдызлы иштиракчилернинъ адларыны тешкилятчылар адетиндже сыр туталар. Чешит сенелери фестивальни эфсаневий джаз давулджысы Джимми Кобб (АКъШ), энъ яхшы латин джазы альбомы ичюн «Грэмми» мукяфатынынъ лауреаты Гонсало Рубакальба (Куба), озь инновацион техникасынен белли американ бас-гитараджы ве контрабасчы Стэнли Кларк, ню-джаз йылдызлары Club Des Belugas (Алмания), уникаль саксофонджы Роберт Анчиполовский (Исраиль), Гейдельбергтен алман De-Phazz группасы зиярет эттилер. KJP-2017 тедбирининъ мусафири РФ президенти Владимир Путин олды.
Koktebel Jazz Party — бу тек дюнья севиедеки джаз дегиль, бу музыка, денъиз, вуджут ве гонъюльнинъ екяне вибрациясыны догъургъан акъикъий азатлыкътыр. Фестиваль тешкиль этилювинен «Красный квадрат» адлы медиагруппа огъраша.
Rap Koktebel — яшлар рэп-медениети ве музыкасынынъ фестивали, Къырымда ильк сефер 2019 сене августнынъ сонъунда кечти. Онынъ кечирилювининъ тешеббюсчиси де Дмитрий Киселев олды.
Koktebel Jazz Party фестивалининъ генераль информацион шериклери: «Россия: телевидение и радио», СМОТРИМ мультимедиа-темели ве «Россия - Культура» телеканалы.
Фестивальнинъ музыкаль шериги Радио JAZZ 89.1 FM оладжакъ.
Koktebel Jazz Party фестивалининъ информацион шериклери: РИА Новости, TimeOut.ru интернет-ресурсы, Изолента live каналы, «Москва 24» телеканалы, Sputnik радиосы, "Комсомольская правда" KP.RU сайты, «Аргументы и факты», ве РИА Новости Крым агентлиги.