Музыкантлар дефаларджа намлы русиели фестиваллернинъ мусафирлери олгъан эдилер, энди исе Къара денъиз ялысында экинджи акъшамны ачаджакълар. Оларнынъ чыкъышлары акъшам саат едиде оладжакъ.
Такъымнынъ солисти Анастасия Лютова матбуат-конференцияда "джаз хасталыгъынынъ" тарихынен пайлашты, бу "В джазе только девушки" адлы фильмнен багълы. Ве акъшам фильмде Мерилин Монро иджра эткен баш йырны иджра этмеге планлаштыра.
"Биз озь аранжировкамыз иле мейнстрим джазыны чаламыз. Амма биринджи невбетте ерли динълейджини назарда тутамыз. Биз чокътан берли Koktebel Jazz Party фестивалинде иджадымызны такъдим этмеге истей эдик, мен мында биринджи кере иштирак этем. Тюневин концертте ве бугунь саундчекте о къадар кучьлю тезлик берильди ки, бугунь меннен мында тек бир иштиракчи етип кельди", - деди тебессюм иле йырджы.
Коллективден онынъ зенаатдашы Алексей Подымкиннинъ фикириндже, мемлекетте озь музыкантларыны эм севгенлери, эм де бильгенлер пек муим. Онынъ ичюн эр вакъыт русиели джазны танытмагъа тырыша.
"Биз озюмизни музыка вастасынен огренемиз ве текрарланмаз бир шей яратмагъа тырышамыз. Биз, япкъанымыз къадар, осемиз, чюнки джаз - бу эснаф, эль иши. Оннен огърашкъан адам, аджайип бир шей яраткъаныны анъламай биле. Бунъа тек сейирджи къыймет кесмеси мумкюн, тек о анълай ве дуя биле", - деп, бильдирди озь фикирини Алексей Подымкин.
Бугунь чалгъыджылар "Енгиль жанр" девирине аит хитлерни ве сийрек иджра этильген джаз стандартларына тойгъун аранжировкаларны иджра этмеге сёз бердилер.
"Эр бир фестивальнинъ озь симасы бар, Коктебельнинъ симасы пек яхшы ифаде этильген", - деп, къайд этти Анастасия Лютова.
Бундан гъайры о хатырлатты ки, "Лютый бэнд" коллективи толусынен рус теркиби иле Японияда озь лейблыны чыкъаргъан биринджи такъым олды. Some like it jazz альбомындан кимер эсерлер бугунь де янгъырайджакъ.