Кечкен базар куню, августнынъ 23-де, Къара денъиз ялысында, Коктебель къасабасында 18-джи джаз мевсими саксофонджы-виртуоз, бестекяр, аранжировкаджы ве Koktebel Jazz Party фестивалининъ арт-мудирлеринден бири Сергей Головнянынъ реберлигинде SG Big Band такъымынынъ чыкъышынен екюнленди.
Учь кунь девамында, августнынъ 21-23 куньлери, фестивальге ад берген артистик къасаба ачыкъ авадаки концерт залына чевирильди. Тахминен 7 бинъ сейирджи Эсас ве Волошин саналарында артистлернинъ чыкъышларыны корьдилер. Текрарланмаз джаз байрамынынъ муитини ачыкъ авада яратмакъ ичюн KJP-2020 тешкилятчылары бинълердже киловаттлы 20 тонна сес ве ышыкъ донатмалар кетирдилер ве монтаж эттилер.
Koktebel Jazz Party къапалувында музыкантлар ве сейирджилерге мураджаат этерек, онынъ темельджиси, фестиваль тешкилий комитетининъ реиси, «Россия Сегодня» халкъара информацион агентликнинъ генераль мудири Дмитрий Киселёв «… эписи алларгъа бакъмадан, Koktebel Jazz Partyге садыкъ къалгъанларгъа» эписине тешеккюрлер бильдирди. «Биз буны этик. Мен садедже частлым», – деп, къайд этти о.
Фестиваль иштиракчилерининъ ве онынъ сейирджилерининъ хавфсызлыгъы темин этильмеси ичюн, фестивальнинъ тешкилий комитети тарафындан коронавирус боюнджа Роспотребнадзор идаресининъ эписи санитар талаплары риает этильди. Буны тевсир этерек, Киселёв бойле къайд этти: «Биз курьсюлерни ерлештирдик, арада бир бош ер къалдырмагъа риджа эттик. Маскалар, санитайзерлер, сынъырланувлар. Амма бунъа бакъмадан къоджаман байрам эльде этик, биз оны сагъынгъан эдик. Бу энди он секизинджи фестиваль, чагъына етювни къайд этмемеге чаре ёкъ эди».
Августнынъ 21 куню, акъшам фестивальни Петр Востоковнынъ реберлигинде буюк джаз оркестри, Esh адлы бразиль джаз ансамбли, Manka Groove, Лариса Долина ве Хибла Герзмава иле Яков Окуннинъ йылдызлы ансамбли ачтылар. Коронавируснен багълы сынъырланувларгъа бакъмадан, фестиваль халкъара статусыны тасдыкълады: биринджи куню Лос-Анджелестен джанлы багъ вастасынен Dave Yaden Band коллективи чыкъышта булунды. Бу энди аньаневий олгъан «Ышыкъ сурьаты иле джаз» программасы черчивесинде кечирильди.
Джума эрте акъшамы Wild Brass такъымы, Jazz Classic Community такъымы иле Русие халкъ артисти Игорь Скляр, Анастасия Лютова ве онынъ «Лютый бенд» такъымы чыкъышта булундылар. Экинджи кунни «Моральный кодекс» ве онынъ фронтмени Сергей Мазаев екюнледилер.
Фестивальнинъ учюнджи, сонъки куню биринджи оларакъ Даниил Крамернинъ триосы, Chetmen, вокалджы Мариам Мерабова иле Игорь Брильнинъ Bril Family триосы санагъа чыкътылар. Фестивальнинъ арт-мудири Сергей Головнянынъ SG Big Band такъымы иле бир эсерни фортепианода 10-яшлы Варя Киселёва иджра этти. Бу композиция KJP-2020 черчивесиндеки концертлерни екюнледи.
Koktebel Jazz Partyнинъ махсус шериги, «Алроса» къуюмджылар группасы фестиваль куньлери сейирджилер арасында мукяфатлар даркъатылувы боюнджа лотерея кечирди. Бундан гъайры Эсас санада концертлер девамында фестивальнинъ учь куню де махсус давуш ольчеген алет иле чыкъышта булунгъан артистлерге сейирджилернинъ алгъышлары ольченильди. Ве концертлернинъ сонъунда бельгиленген гъалипни «Алроса» мукяфатнен такъдирледи.
Koktebel Jazz Party 2021 фестивалининъ куньлери энди белли: тедбир августнынъ 20-22 куньлери кечириледжек.
2020 сене апрель айында Koktebel Jazz Party фестивали «Россия Сегодня» халкъара информацион агентликнен ве «Красный квадрат» медиагруппасынен бераберликте Doctor Jazz Party онлайн-марафоныны тешкиль эткен эди. Бойле этип коронавирус пандемиясына къаршы куреш девиринде Русиели тиббийджилерге ве хастаханелерге къолтутылды. Марафон Халкъара джаз куню, апрельнинъ 30-да башланды. О, Рунет лидери, ria.ru сайтында ве ВКонтакте саифесинде РИА Новости агентлигининъ ресмий аккаунтында алып барылды. Doctor Jazz Party адлы онлайн-марафон докъуз мемлекеттен джаз музыкасынынъ йылдызларыны, шу джумледен Русие, Къытай, АКъШ, Бразилия, Япония чалгъыджыларыны бирлештирди. Марафон еди саат девам этти, иштиракчилернинъ чыкъышларыны эки миллионгъа якъын адам сейир этти.
Koktebel Jazz Party 2003 сене Коктебель джазынынъ темель къоювджысы — журналист Дмитрий Киселёвнинъ шахсий тешеббюси киби пейда олды. Кичик Къырым кою дюньяджа белли джаз тедбирлери джедвелине кирген фестивальге ад берди. Йылдызлы иштиракчилернинъ адларыны тешкилятчылар адетиндже сыр туталар. Чешит сенелери фестивальни эфсаневий джаз давулджысы Джимми Кобб (АКъШ), энъ яхшы латин джазы альбомы ичюн «Грэмми» мукяфатынынъ лауреаты Гонсало Рубакальба (Куба), ню-джаз йылдызлары Club Des Belugas (Алмания), уникаль саксофонджы Роберт Анчиполовский (Исраиль) зиярет эттилер. KJP-2017 тедбирининъ мусафири РФ президенти Владимир Путин олды.
Koktebel Jazz Party — бу тек дюнья севиедеки джаз дегиль, бу музыка, денъиз, вуджут ве гонъюльнинъ екяне вибрациясыны догъургъан акъикъий азатлыкътыр. Фестивальни «Россия сегодня» халкъара информацион агентлиги кечире. Фестиваль тешкиль этилювинен «Красный квадрат» адлы медиагруппа огъраша. 2014 сенеден берли Koktebel Jazz Party Русие Федерациясы медениет везирлигининъ дестеги иле кечириле.
Koktebel Jazz Party фестивалининъ информацион шериклери оларакъ ВГТРК, Радио JAZZ 89.1 FM, tvzavr интернет-кинотеатри, TimeOut.ru, интернет-ресурс ве радио Sputnik чыкъаджакълар.